नेपालगञ्ज । नेपाल औद्योगिक क्षेत्र व्यवस्थापन लिमिटेड, नेपालगञ्ज शाखाले नेपालगञ्ज औद्योगिक क्षेत्र उद्योग विकास संघलाई भवन निर्माण गर्न प्रदान गरिएको शुन्य दशमलभ ६६ रोपनी जग्गाको औपचारिक सम्झौता भएको छ ।
नेपालगञ्ज औद्योगिक क्षेत्र व्यवस्थापन लिमिटेडका कार्यालय प्रमुख प्रदीप पराजुलीले संघसँगको सहकार्यलाई अझ सशक्त बनाउँदै छिटोभन्दा छिटो भवन निर्माण कार्य सम्पन्न गरी संघका गतिविधिहरू सञ्चालन गरिने बताए ।
प्रमुख पराजुलीले उद्योगी र व्यवस्थापन कार्यालयबीचको सम्बन्ध थप प्रगाढ बनाउने तथा समन्वयपूर्ण वातावरणमा उद्योग सञ्चालन गर्न सबै पक्ष प्रतिवद्ध रहनु पर्ने धारणा राखेका थिए ।
यसैगरी संघका अध्यक्ष अब्दुल वाहिद अन्सारीले जेठ ३१ गते सम्पन्न दोस्रो अधिवेशनबाट अध्यक्षमा निर्वाचित भएपछि आफू योजनाबद्ध ढंगले अघि बढि रहेको जानकारी दिएका थिए ।
जग्गा सम्झौता हाम्रो दीर्घकालिन योजना अनुसारको पहिलो पाइला हो, अब हामी छिट्टै भवन निर्माण कार्य सुरु गर्दैछौ,’ उनले भने । उद्योगी समुदायको साझा उद्देश्यमा एकता र सहभागिता अझ मजबुत बनाउने लक्ष्यसहित संघले निर्माण कार्य अगाडी बढाउने जनाए ।
